ଓଡ଼ିଶାକୁ ଦେଶର ଏକ ପ୍ରମୁଖ ଶିଳ୍ପ ହବ୍ରେ ପରିଣତ କରିବା ଲକ୍ଷ୍ୟରେ ଯାଜପୁର ଜିଲ୍ଲାର କଳିଙ୍ଗନଗରରେ ଆୟୋଜିତ ହୋଇଛି ଏକ ବଡ଼ ଶିଳ୍ପ ସମାରୋହ। ଏହି କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ବିଭିନ୍ନ ଶିଳ୍ପ ପ୍ରକଳ୍ପର ଶିଳାନ୍ୟାସ ଓ ଶୁଭାରମ୍ଭ କରିଛନ୍ତି। କାର୍ଯ୍ୟକ୍ରମର ମୁଖ୍ୟ ସ୍ଲୋଗାନ ରହିଥିଲା— “ନୂଆ ଶିକ୍ଷା, ନୂଆ ଆଶା, ସମୃଦ୍ଧି ପଥେ ସାରା ଓଡ଼ିଶା”
ଏହି ଅବସରରେ ୩୯,୩୮୭ କୋଟି ଟଙ୍କା ମୂଲ୍ୟର ଶିଳ୍ପ ପ୍ରକଳ୍ପଗୁଡ଼ିକର ଶିଳାନ୍ୟାସ ଓ ଶୁଭାରମ୍ଭ କରାଯାଇଥିବା ବେଳେ ଏହା ଦ୍ୱାରା ୪୨,୦୧୨ଟି ନିଯୁକ୍ତି ସୁଯୋଗ ସୃଷ୍ଟି ହେବା ନେଇ ଘୋଷଣା କରାଯାଇଛି। ଏହି ନିବେଶ ରାଜ୍ୟର ଶିଳ୍ପ ଭିତ୍ତିଭୂମିକୁ ଆହୁରି ସୁଦୃଢ଼ କରିବା ସହ ଯୁବପିଢ଼ିଙ୍କ ପାଇଁ ନୂଆ ରୋଜଗାରର ସୁଯୋଗ ସୃଷ୍ଟି କରିବା ଆଶା ରହିଛି।
କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଫଟୋ ସହ ରାଜ୍ୟର ବିକାଶ ଓ ସମୃଦ୍ଧିକୁ ନେଇ ସ୍ଲୋଗାନ ଥିବା ଏକ ବିଶାଳ ମଞ୍ଚ ପ୍ରସ୍ତୁତ କରାଯାଇଥିଲା। ମୁଖ୍ୟମନ୍ତ୍ରୀଙ୍କ ସହ ବରିଷ୍ଠ ପ୍ରଶାସନିକ ଅଧିକାରୀ, ଶିଳ୍ପ ପ୍ରତିଷ୍ଠାନର ମୁଖ୍ୟ ଓ ଜିଲ୍ଲା ପ୍ରଶାସନର ଅଧିକାରୀମାନେ ଉପସ୍ଥିତ ଥିଲେ।
ମୁଖ୍ୟମନ୍ତ୍ରୀ କହିଛନ୍ତି ଯେ ରାଜ୍ୟରେ ଶିଳ୍ପର ବିକାଶ ହେଲେ ଯୁବକଯୁବତୀଙ୍କୁ ନିଜ ରାଜ୍ୟରେ ନିଯୁକ୍ତିର ସୁଯୋଗ ମିଳିବ। ଏହାଦ୍ୱାରା ବେକାରୀ ସମସ୍ୟା ହ୍ରାସ ପାଇବା ସହ ରୋଜଗାର ପାଇଁ ଅନ୍ୟ ରାଜ୍ୟକୁ ଯିବାର ଆବଶ୍ୟକତା କମିବ ଏବଂ ଓଡ଼ିଶାର ଅର୍ଥନୈତିକ ବିକାଶ ତ୍ୱରାନ୍ୱିତ ହେବ। ଶିଳ୍ପ ପ୍ରତିଷ୍ଠା ପାଇଁ ଆବଶ୍ୟକ ସହଯୋଗ ଯୋଗାଇଦେବା ଉପରେ ମଧ୍ୟ ସରକାର ଗୁରୁତ୍ୱ ଦେଇଛନ୍ତି।
ଏହି ଅବସରରେ ପୂର୍ବ ସରକାରଙ୍କ ଶିଳ୍ପ ନୀତିକୁ ନେଇ ମଧ୍ୟ ମୁଖ୍ୟମନ୍ତ୍ରୀ ସମାଲୋଚନା କରିଥିଲେ। ନୂଆ ଶିଳ୍ପ ନିବେଶ ମାଧ୍ୟମରେ ଓଡ଼ିଶାରେ ଅଧିକ ରୋଜଗାର, ଶିଳ୍ପ ବିକାଶ ଓ ଆର୍ଥିକ ସମୃଦ୍ଧି ଆଣିବା ସରକାରଙ୍କ ଲକ୍ଷ୍ୟ ବୋଲି ସେ ଉଲ୍ଲେଖ କରିଥିଲେ।
କଳିଙ୍ଗନଗର ଦୀର୍ଘଦିନ ଧରି ଓଡ଼ିଶାର ଶିଳ୍ପ ବିକାଶର ଏକ ପ୍ରମୁଖ କେନ୍ଦ୍ର ଭାବେ ପରିଚିତ। ଏଠାରେ ନୂଆ ନିବେଶ ଓ ପ୍ରକଳ୍ପର ଶୁଭାରମ୍ଭ ରାଜ୍ୟର ଶିଳ୍ପ ଅଭିବୃଦ୍ଧିକୁ ଆଗକୁ ନେବାରେ କେତେ ସଫଳ ହେବ, ତାହା ଆଗାମୀ ଦିନରେ ପ୍ରକଳ୍ପଗୁଡ଼ିକର କାର୍ଯ୍ୟାନ୍ୱୟନ ଓ ନିଯୁକ୍ତି ସୃଷ୍ଟି ଉପରେ ନିର୍ଭର କରିବ।
କଳିଙ୍ଗନଗରରୁ ଶିଳ୍ପ ବିକାଶର ନୂଆ ଅଧ୍ୟାୟ ଆରମ୍ଭ କରିବାର ଲକ୍ଷ୍ୟ ସହ ଓଡ଼ିଶାକୁ ଶିଳ୍ପ ହବ୍ରେ ପରିଣତ କରିବା ଦିଗରେ ସରକାରଙ୍କ ଏହି ପଦକ୍ଷେପ ଏବେ ଚର୍ଚ୍ଚାରେ ।
